श्रीगुरु चरन सरोज रज निज मनु मुकुरु सुधारि ।

बरनऊँ रघुबर बिमल जसु जो दायकु फल चारि ॥

बुद्धिहीन तनु जानिके सुमिरौं पवन-कुमार ।

बल बुधि बिद्या देहु मोहिं हरहु कलेस बिकार ॥

जय हनुमान ज्ञान गुन सागर । जय कपीस तिहुँ लोक उजागर ॥ १ ॥

राम दूत अतुलित बल धामा । अंजनि-पुत्र पवनसुत नामा ॥ २ ॥

महाबीर बिक्रम बजरंगी । कुमति निवार सुमति के संगी ॥ ३ ॥

कंचन बरन बिराज सुबेसा । कानन कुंडल कुंचित केसा ॥ ४ ॥

हाथ बज्र औ ध्वजा बिराजै । काँधे मूँज जनेऊ साजै ॥ ५ ॥

संकर सुवन केसरीनंदन । तेज प्रताप महा जग बंदन ॥ ६ ॥

बिद्यावान गुनी अति चातुर । राम काज करिबे को आतुर ॥ ७ ॥

प्रभु चरित्र सुनिबे को रसिया । राम लखन सीता मन बसिया ॥ ८ ॥

सूक्ष्म रूप धरि सियहिं दिखावा । बिकट रूप धरि लंक जरावा ॥ ९ ॥

भीम रूप धरि असुर सँहारे । रामचंद्र के काज सँवारे ॥ १० ॥

लाय सजीवन लखन जियाये । श्रीरघुबीर हरषि उर लाये ॥ ११ ॥

रघुपति कीन्ही बहुत बड़ाई । तुम मम प्रिय भरतहि सम भाई ॥ १२ ॥

सहस बदन तुम्हरो जस गावैं । अस कहि श्रीपति कंठ लगावैं ॥ १३ ॥

सनकादिक ब्रह्मादि मुनीसा । नारद सारद सहित अहीसा ॥ १४ ॥

यम कुबेर दिगपाल जहाँ ते । कबि कोबिद कहि सके कहाँ ते ॥ १५ ॥

तुम उपकार सुग्रीवहिं कीन्हा । राम मिलाय राज पद दीन्हा ॥ १६ ॥

तुम्हरो मंत्र बिभीषन माना । लंकेस्वर भए सब जग जाना ॥ १७ ॥

जुग सहस्र जोजन पर भानू । लील्यो ताहि मधुर फल जानू ॥ १८ ॥

प्रभु मुद्रिका मेलि मुख माहीं । जलधि लाँघि गये अचरज नाहीं ॥ १९ ॥

दुर्गम काज जगत के जेते । सुगम अनुग्रह तुम्हरे तेते ॥ २० ॥

राम दुआरे तुम रखवारे । होत न आज्ञा बिनु पैसारे ॥ २१ ॥

सब सुख लहै तुम्हारी सरना । तुम रक्षक काहू को डर ना ॥ २२ ॥

आपन तेज सम्हारो आपै । तीनों लोक हाँक तें काँपै ॥ २३ ॥

भूत पिसाच निकट नहिं आवै । महाबीर जब नाम सुनावै ॥ २४ ॥

नासै रोग हरै सब पीरा । जपत निरंतर हनुमत बीरा ॥ २५ ॥

संकट तें हनुमान छुड़ावै । मन क्रम बचन ध्यान जो लावै ॥ २६ ॥

सब पर राम तपस्वी राजा । तिन के काज सकल तुम साजा ॥ २७ ॥

और मनोरथ जो कोई लावै । सोइ अमित जीवन फल पावै ॥ २८ ॥

चारों जुग परताप तुम्हारा । है परसिद्ध जगत उजियारा ॥ २९ ॥

साधु संत के तुम रखवारे । असुर निकंदन राम दुलारे ॥ ३० ॥

अष्ट सिद्धि नौ निधि के दाता । अस बर दीन जानकी माता ॥ ३१ ॥

राम रसायन तुम्हरे पासा । सदा रहो रघुपति के दासा ॥ ३२ ॥

तुम्हरे भजन राम को पावै । जनम जनम के दुख बिसरावै ॥ ३३ ॥

अंत काल रघुबर पुर जाई । जहाँ जन्म हरि-भक्त कहाई ॥ ३४ ॥

और देवता चित्त न धरई । हनुमत सेइ सर्ब सुख करई ॥ ३५ ॥

संकट कटै मिटै सब पीरा । जो सुमिरै हनुमत बलबीरा ॥ ३६ ॥

जय जय जय हनुमान गोसाईं । कृपा करहु गुरुदेव की नाईं ॥ ३७ ॥

जो सत बार पाठ कर कोई । छूटहि बंदि महा सुख होई ॥ ३८ ॥

जो यह पढ़ै हनुमान चालीसा । होय सिद्धि साखी गौरीसा ॥ ३९ ॥

तुलसीदास सदा हरि चेरा । कीजै नाथ हृदय मँह डेरा ॥ ४० ॥

पवनतनय संकट हरन मंगल मूरति रूप ।

राम लखन सीता सहित हृदय बसहु सुर भूप ॥

Shri Guru Charan Saroj Raj Nij Manu Mukuru Sudhari |

Barnau Raghuvar Bimal Jasu Jo Dayaku Phal Chari ||

Buddhiheen Tanu Janike Sumirau Pavan Kumar |

Bal Buddhi Vidya Dehu Mohi Harahu Kalesh Bikaar ||

Jai Hanuman Gyan Gun Sagar | Jai Kapis Tihun Lok Ujagar || 1 ||

Ram Doot Atulit Bal Dhama | Anjani-Putra Pavansut Nama || 2 ||

Mahavir Bikram Bajrangi | Kumati Nivar Sumati Ke Sangi || 3 ||

Kanchan Baran Biraj Subesa | Kanan Kundal Kunchit Kesa || 4 ||

Hath Bajra Au Dhvaja Birajai | Kaandhe Moonj Janeu Saajai || 5 ||

Sankar Suvan Kesarinandan | Tej Pratap Maha Jag Bandan || 6 ||

Vidyavan Guni Ati Chatur | Ram Kaaj Karibe Ko Aatur || 7 ||

Prabhu Charitra Sunibe Ko Rasiya | Ram Lakhan Sita Man Basiya || 8 ||

Sukshma Roop Dhari Siyahin Dikhava | Bikat Roop Dhari Lanka Jarava || 9 ||

Bheem Roop Dhari Asur Sanhare | Ramachandra Ke Kaaj Sanvare || 10 ||

Laye Sajivan Lakhan Jiyaye | Shri Raghuveer Harashi Ur Laye || 11 ||

Raghupati Keenhi Bahut Badai | Tum Mam Priya Bharatahi Sam Bhai || 12 ||

Sahas Badan Tumharo Jas Gavai | Asa Kahi Shripati Kanth Lagavai || 13 ||

Sanakadik Brahmadi Munisa | Narad Sarad Sahit Ahisa || 14 ||

Yam Kuber Digpal Jahan Te | Kavi Kobid Kahi Sake Kahan Te || 15 ||

Tum Upkar Sugreevahin Keenha | Ram Milay Raj Pad Deenha || 16 ||

Tumharo Mantra Vibhishan Maana | Lankesvar Bhaye Sab Jag Jaana || 17 ||

Yug Sahasra Yojan Par Bhanu | Leelyo Taahi Madhur Phal Jaanu || 18 ||

Prabhu Mudrika Meli Mukh Maahi | Jaladhi Langhi Gaye Achraj Naahi || 19 ||

Durgam Kaaj Jagat Ke Jete | Sugam Anugrah Tumhare Tete || 20 ||

Ram Duare Tum Rakhvare | Hot Na Agya Binu Paisare || 21 ||

Sab Sukh Lahai Tumhari Sarna | Tum Rakshak Kahu Ko Dar Na || 22 ||

Aapan Tej Samharo Aapai | Teeno Lok Haank Te Kaapai || 23 ||

Bhoot Pisach Nikat Nahi Aavai | Mahavir Jab Naam Sunavai || 24 ||

Nasai Rog Harai Sab Peera | Japat Nirantar Hanumat Beera || 25 ||

Sankat Te Hanuman Chhudavai | Man Kram Bachan Dhyan Jo Lavai || 26 ||

Sab Par Ram Tapasvi Raja | Tin Ke Kaaj Sakal Tum Saaja || 27 ||

Aur Manorath Jo Koi Lavai | Soi Amit Jeevan Phal Pavai || 28 ||

Charo Yug Partap Tumhara | Hai Parsiddh Jagat Ujiyara || 29 ||

Sadhu Sant Ke Tum Rakhvare | Asur Nikandan Ram Dulare || 30 ||

Ashta Siddhi Nau Nidhi Ke Daata | As Bar Deen Janaki Maata || 31 ||

Ram Rasayan Tumhare Paasa | Sada Raho Raghupati के दासा || 32 ||

Tumhare Bhajan Ram Ko Paavai | Janam Janam Ke Dukh Bisravai || 33 ||

Ant Kaal Raghuvar Pur Jai | Jahan Janma Hari-Bhakt Kahai || 34 ||

Aur Devta Chitt Na Dharai | Hanumat Sei Sarba Sukh Karai || 35 ||

Sankat Katai Mitai Sab Peera | Jo Sumirai Hanumat Balbeera || 36 ||

Jai Jai Jai Hanuman Gosai | Kripa Karahu Gurudev Ki Nai || 37 ||

Jo Sat Baar Paath Kar Koi | Chhutahi Bandi Maha Sukh Hoi || 38 ||

Jo Yeh Padhai Hanuman Chalisa | Hoy Siddhi Saakhi Gaurisa || 39 ||

Tulsidas Sada Hari Chera | Keejai Naath Hriday Mah Dera || 40 ||

Pavantanay Sankat Haran Mangal Murti Roop |

Ram Lakhan Sita Sahit Hriday Basahu Sur Bhoop ||